TRES CIERVES PSICOPOMPES


Aquella mañana taba llocu por llegar ceo pa la oficina. L'informe completu d'una afayadura arqueolóxica de primerísimu nivel esperába-y en despachu a poco menos de trenta kilómetros de curves que nun fueren trazaes precisamente p'aficionaos.
Un amanecer d'airón violentu sacudía les castañales y escardaba los praos; el conceyal de cultura tenía un Peugeot 205 Turbo, blancu y negru, al que llamaba con ciñu "la pega". Un pepinu, na xíriga de los llocos poles competiciones de rallies, que yera de lo mas apropiao pa correr peles carreteres del mediu rural astur. El conceyal diba perfechamente encaxáu nel asientu de competición, col volante de tres radios bien garráu coles manes na posición de les tres menos cuartu, aprovechando'l diseñu d'un chasis qu'encariaba les trazaes cola perfeición d'una impresora de planos imprimiendo les curves de nivel d'un mapa. Con movimientos mecánicos y precisos, sacába-y al cambiu lo meyor de sigo mesmo p'aprovechar con xeitu la potencia del motor, dándo-y a cada pasu de curva'l númberu exautu de vueltes y caballos de potencia.
L'asfaltu taba seco, ideal pa estrozar el so rexistru personal nel trayeutu, que yera de 23 minutos a una media verdaderamente alta de 75 kilómetros a la hora, n'hora punta y día llaborable, colos consecuentes ya inevitables riesgos d'estropiar la cronometrada por mor d'atopar na carretera un tractor con una carga de verde o de cuchu, una cuba de recoyía de lleche, un vieyín nuna d'eses futingues que puen llevase ensin carné de conducir, l'autobús de los escolinos, un paisanu llevando les vaques al prau, o cenciellamente, too ello en caravana.
Mentanto, la so cabeza diba igualmente revolucionada, dándo-y vueltes y revueltes a la noticia que l'arqueólogu que contratara l'ayuntamientu-y diera pela nueche: nuna de les calicates abiertes nel espaciu onde se pensaba que tuviere'l cementeriu de la villa medieval apaeciera una estela funeraria, con restos d'una inscripción en llatín y un venáu grabáu nel ángulu inferior derechu, que diba delantre d'un caballu con unos garabatos que paecíen ser unes iniciales. De momentu, namás que pudiera adelanta-y que seguramente volvieren a usala nuna dómina posterior a la orixinal, y que la calidá de la traza del animal psicopompu, ello ye, el que guiaba al difuntu al mas p'acullá nes sociedaes prerromanes al norte del ríu Duero, yera esceicional.
Namás pasar una de les poques rectes del tramu, a unos quinientos metros y tres curves mas pa en delantre, surdió una cierva del sucu izquierdu a les carreres, crució la carretera y tiróse monte p'arriba pente una viesquina de carbayos. El conceyal llevantó'l pie del acelerador por instintu, hasta que cien metros dempués, cuando ya volviera a acelerar, apaeció una segunda, que fixo otru tanto. Nun acababa de superar la doble impresión cuando un tercer exemplar de fema de Cervus elephus plantóse-y énte los faros del coche, viniente de la mesma carril que les otres. Entós tuvo de meté-y un zapatazu al pedal del frenu, espetando les ruedes nel asfaltu, lo que fexo que'l coche marchara en plancha detrás del bichu, que ficiera un zis-zas pa safase del emburrión. Sicasí, nun fue quien pa evitar calcá-y col morru per detrás, masque ensin mancala seriamente, diendo depués a meter la rueda derecha na cuneta. Por suerte, ella pudo siguir el camín de les sos compañeres d'afuxida, de lo cuálo allegróse enforma, porque pa nada quería firir o matar dengún animal indefensu.
Superáu'l sustu, metió marcha atrás y fizo maniobra pa sacar la rueda del riegu, pero resbariaba y nun había manera de que garrara tracción. Cuando ya taba sacando'l teléfonu móvil pa llamar a los d'asistencia en carretera, apaeció un xitanu d'unos sesenta años, con sombreru y chaqueta de cueru negro, un calderu blancu de plásticu na mano, y una cachaba colgando del brazu. Averóse a la ventana y picó-y en cristal colos deos.
- ¿Sí?
- A les bones, tuvo bien cerca, ¿eh?… Espere, que lu ayudo. Cuando yo calque'l morru p'abaxo, usté píse-y con tientu.
Púnxose coles dos manes enriba'l capó. El conceyal volvió meter la marcha atrás, y de la qu'elli cargaba tol pesu del so cuerpu, pisó suave l'acelerador. Depués de delles vueltes resbariando como una piedra esmeril, la goma del neumáticu garró asfaltu, por fin, y el coche salió pa la carretera.
- Munches gracies, paisanu, si nun ye por usté pierdo equí media mañana.
- A mandar, nun faltaba más. Oiga, señor, a tou esto ¿nun podría llevame usté hasta l'altu?
- Home, por dios, nun faltaba mas. Suba p'acá.
El xitanu, que tenía tolos aires de ser patriarca y de tener muncho mundu andao, sentóse a la so vera, ensin poner el cinchu.
- La verdá, qué quier que-y diga, nunca nun pensara yo que diba atopame con tres cierves equí, práuticamente a cinco kilómetros de la ciudá y a menos de dos de l'autopista.
- Éstes vienen d'una batida -respondió elli-, sentí yo los tiros pa escontra'l Picu Bufarán fairá una media hora.
- ¡Coñu, pero que vengan afuxendo pa contra la ciudá, tien cantu la cosa…!.
- A saber per onde vendríen acorrándoles.
A los tres o cuatro kilómetros llegaben al altu de L'Arreigada.
- Tire un poco mas p'allá, hasta pasar aquella cabaña que se ve a la vera d'aquella carril.
L'otru obedeció hasta que-y fizo indicaciones de parar.
- ¿Nun podría usté esperame, si nun-y da mas?, ye un momentín de nada -preguntó-y con respetu, a lo que'l conceyal respondió que sí, porque se sentía en delda con elli-.
- Claro, nun se preocupe.
El patriarca posóse del coche y allegóse pa una portiella que daba pasu pa una finca. Quedóse ellí, mirando tola panorámica que se-y presentaba pal Norte, y qu'abarcaba tola llinia de la Mariña dende'l baxu Nalón hasta Xixón, que s'identificaba polos depósitos de gas de la Campa Torres, quedando en medio la Ría d'Avilés y el Cabu Peñes. Depués de menos de mediu minutu volvió pal coche.
- ¿Pue llevame pal otru llau del altu?
- Por supuestu -dixo, intrigáu-.
Namás dexar atrás l'altu, baxando pa la otra vertiente, volvió posase y fizo otro tanto mirando pa tol valle del ríu Dele, dominando cola vista medio Conceyu de Candamu hasta la vega de Grau. Depués de dar vueltes alredor de sigo mesmu, mirando pal rasu y pal cielu, volvióse pal conductor del Peugeot.
- ¿Sedría muncho pidir que m'allegara usté hasta ehí pa enriba, camín de La Mafaya? -taba refiriéndose a la carreterina llocal que lleva pal valle que-y da nome al Conceyu-. De verdá que nun-y voi robar ya mas d'un minutu.
El representante del pueblu entamaba a tar roceanu con tantes vueltes al debalu. Llevaba feches dos paraes nunos pocos kilómetros, y agora pidía-y otra más nuna carreterina pola que pasaríen dos o tres coches en tol día.
Entós arreventó na so mente'l significáu científicu del términu "psicopompu" na historiografía: una espresión que se refier al ser que nes mitoloxíes y relixones antigües tien el papel de guiar les ánimes de los difuntos al "otru llau", y qu'amás d'animales, tamién s'identifica con bisarmes, ánxeles o degorrios.
Miró pal bohemiu con respetu y esmolecía sospecha, ¿acasu nun apaeciera xustamente depués de pasar les cierves?, pensaba. ¿Y si aquellos animales taben agüerándolu pa qu'andara con cudiáu? ¿Taríen enseñándo-y el camín pal mas p'acullá…?.
Sicasí, ¿qué podía facer mas que llevalu, énte la falta d'argumentos pa negase a ello, mas que dicí-y que ya entamaba a facése-y tarde pa llegar al trabayu? Elli disculpóse con aparente sinceridá:
- Perdone, pero nun contaba yo con tenelu a usté al retorteru, ye que nun acabo de dar colo que toi buscando.
- Ya…
Volvió posase no cimero del altu onde se garra'l ramal pa tirar pa un pueblín que llamaben La Mafaya, según dicía'l lletreru indicador, y volvió metese prau p'alantre hasta que tuvo una perspeutiva panorámica que llegaba dende la mar hasta los montes del Macizu Asturiano. Al conceyal ya nun-y quedaba dulda de que taba ganando tiempu, buscando'l sitiu mas indicáu pa da-y l'estacazu: el llugar del asaltu, el puntu conveníu del atracu, l'escenariu del crime.
Y quedó-y inda mas claro cuando lu vio sacar un teléfonu móvil del bolsu interior de la chaqueta, marcar un númberu, y falar mui seriu ensin quita-y el güeyu d'enriba. Seguramente taba falando colos sos compinches, dándo-ys les cordenaes exautes del terrenu acotáu pa cometer el delitu. Rápidamente púnxose, como quien nun quier la cosa, a dar la vuelta na carreterina, metiendo la culera del 205 pa contra un caminucu que daba entrada pa una finca. Nesi intre, el xitanu colgó'l teléfonu y foi pal coche tou sonriente.
- Gracies, nun sabe usté lo que-y lo agradezo, señor, ya vienen p'acá los mios fíos y recuéyenme ellos. Siento'l tiempu que-y fici perder…
- Non, home, non, encantáu de poder correspondé-y, nun faltaba mas -dixo, escondiendo malpenes la vergoña que sentía quemándo-y per dientro, por habese dexao llevar por primixenios ya inxustos prexuicios-, pero, si nun ye indiscreción, ¿qué yera lo qu'andaba buscando usté?
- ¡Ai, hom, la nube!
- ¿Qué nube?, y perdone la mio inorancia, por favor.
- Pues… la nube, ¿qué nube va ser?, ensin nube nun hai agua. Y ensin agua, amigu, nun sal de nenguna de les maneres -l'otru siguía ensin entendelu-.
- Pero nun sal, ¿quién, el qué?...
- ¿El qué va a ser? -dixo'l xitanu muertu de la risa-, ¡el cascoxu! Agora mesmo orpina na vega de Pinullán hasta Riberas. Acabo de llamar a los fíos pa tirar p'allá enantes que llugue'l sol.
Quedó cola impresión de tar énte una d'eses situaciones qu'acaben convertiéndose en prestosísimes anéudotes, pa plasmu y envidia de los amigos, y mas cuando son frutu de la propia esperiencia. Aquel bon home yera un verdaderu y xenuín adoraor del tempestariu astur por escelencia: el Nuberu. Siguía les nubes valle a valle, de vallina en vallina, a la gueta del moluscu gasterópodu tan apreciáu n'otros llares.
Despidiéronse candialmente, el conceyal escondiendo la so mala conciencia pol anterior ataque prexuiciosu de terrible sospecha de tar énte poco menos qu'un asesín en serie, y elli cola impaciencia pintada na cara, seguramente esperando poder conta-ys a los sos fíos la so versión de la historia del payo medrosu, porque la medrana del responsable de la política cultural del so conceyu tenía de ser perceutible a la llegua.
Cuando entró na oficina y se sentó na mesa del so despachu tenía dos sobres zarraos esperándolu. Ún tenía'l logotipu de la empresa de los arqueólogos. L'otru yera de la mutualidá llaboral, ensin duldes l'informe del reconocimientu médicu que ficiera diez díes p'atrás. Pensó cuálu de los dos diba abrir primero. Decidióse pol de la mutua pa poder concentrase meyor depués nel informe de la escavación, a les sos anches.
Na tabla analítica había tres pallabres destacaes en tinta verde fluorescente con rotulaor de solliñar, que según-y resonaron na cabeza, y al tiempu que lleía les cifres que teníen asociaes en miligramos por llitru de sangre, ficiéron-y ver otra vuelta les tres cierves saltando penriba la carretera,y qu'agora teníen nomes a non duldar psicopompos: colesterol, triglicéridos y glucosa.

 

HISTORIA FUNDACIÓN - DOLORES FDEZ. LEMA - BASES CONCURSO - PREMIO ESCOLAR - PREMIADOS - ENTREGA PREMIOS - CONTACTO