PERFORMANCE

 

Premiu de Relatu Curtiu

en llingua asturiana 2007

PERFORMANCE


Chovía a bastos. Yera un día d'estos metíos n'augua que casi nun podías salir de casa nin con parauguas, porque anque seya poco'l trayeutu a recorrer, pillas una pingadura que t'empapa hasta los güesos ya tienes que mudate de pías a cabeza. Nunca me gustóu l.levar parauguas, pues deixábalu esqueicíu en tolas partes ya por eso los mious parauguas yeran ruinos; mercábalos no mercáu de los más baratos. A poco que soplara l'aire dabais la vuelta ya tenía que tiralos no primer contenedor qu'alcontrara.
Tuvi parauguas de tolos colores ya tamaños. El más exóticu, ún de color rosa con una varilla rota qu'heredé de la mio fía. Tuvi qu'echar mano d'él porque yera l'únicu qu'había en casa. Aquel día fui l'almiración de la xente; toos miraben pa mí pola calle, dalgunos hasta disimulaban p'aguantar la risa. ¡Un paisanu como yo baxo aquel parauguas diminutu, de color rosa…! Ya esi día tamién lu perdí. Dexéilu nel paragüeru de la esposición ya cuando salí taba'l sitiu.
La mia muyer conocedora de tolos percances que me pasaban colos parauguas foi a "los chinos" ya regalóume un parauguas grande, de doble varillax, ya un pouco l.lamativu, pero por esa formación o deformación profesional, enseguida-y atopéi significáu. D'una parte porque me lo regalara la mia muyer, ya d'outra, como al abrilu se vía l'universu, you inventéi sobre aquel "techu", un universu fantásticu ya una historia que me l.levóu entreteníu hasta la esposición. El parauguas, por fuera, yera de color moráu escuru, ya por dientro yera negru intensu, pintáu colas estrel.las, la L.luna, los planetas…que s'il.luminaban cola escuridá. Realmente yera un parauguas p'abrilu pola nueite. You que soi un ser noctámbulu sentíame identificáu col parauguas-universu .
Garré'l gabán azul marinu que me facía xuegu col parauguas nuevu. Yá yera hora, porque yá los l.levara de tolas tonalidades ya colores…
- Al.légrome que te guste, Antón, espero qu'esti nun lu pierdas. Esti vei ser difícil que te lu vuelva l'aire, tien varillas de seguridá, antivuelcu ya antitoo. Esbarria l'augua pola tela ya asina puedes l.levalu siempre contigo ya nun va moyate la roupa; nun fai falta que lu deixes en nengún paraugüeru. Amás vas un pouco más curiosu, porque chegar a esas xuntas importantes que tu tienes con parauguas rotos ya estrozaos, tampouco paez bien…
-Perfeutu, el parauguas perfeutu, ya verdá. Pero nun quedrás tu agora que seya como la Comisaria del eventu de güei, qu'hasta'l mangu'l parauguas l.lieva a xuegu col col.lar ya los pendientes…
-¡Abondo reparas na c o m i s a r i i i i a esa! -remungóu la mia muyer con rocea.
-Non, si eso salta a la vista ¡un atuendo tan conxuntáu!, yá sabes que los artistas fixámonos en tolos detalles...pero,daveras, da un pouco d'ascu mirar p'aquel.la cara con una capa maquillax que paez que tamos siempre n'antroidu; una aclaración necesaria pa la mia muyer, pa qu'el.la nun cavilara tochuras.
Xustamente entrando na esposición, tropecéi de morros cola Comisaria que se cantoneaba d'un l.lau pa outru col reprís que la caracterizaba.
-Home, Antón ¿qué tal? Hooo , ¡Vaya parauguas! (Fixóuse no miou paraguas).
-Sí, ya un regalu de Maite, la mia muyer. Yá sabes, como los deixo en tolas partes, siempre l.levaba parauguas ruinos ya estrozaos, ya durábanme dous días, cuando nun-yos caía'l mangu, volvíamelos l'aire. Asina que d'esti nun puedo desapegame porque si'l primer día me desapaez ¡cómo lo esplico you en casa!
Salimos de la esposición, después de falar ante'l públicu, you ensin desapegame del mio parauguas, ya dirixímonos al bar onde nos tenían preparáu un "vinu español", después d'inventar un mundu pa cada cuadru ya describir aquel ambiente con palabras de tal esquisitez, cuanto más raras meyor, que naide de los presentes entendía, pero tratábase d'eso, esto tamién forma parte del arte, el palabreru pa facer la crítica; ún nun puede caer no vulgar.
Chegamos al chigre, que taba chen de xente, ya pasamos pa una esquina onde nos tenían reserváu un requeixu. You apoyéime no miou parauguas con una mano, a mou de cayaú, ya' l vinu na outra; un pinchín agora, outru l.lou, anque you soi de poucu comer… Había abonda xente nel bar naquel momentu ya muitu baruyu. Encomenzamos una animada conversación sobre artistas ya la sua obra, monotema casi siempre después d'inaugurar una esposición. La Comisaria metíase por mí pa falar, yera ésta una zuna fea que tenía, ya you las primeras veces que compartí con el.la estos eventos, nun sabía cómo interpretar aquel averamientu. El sou aliendu entrábame pola nariz, pola boca ya hasta'l cabu la garganta…A mí que nun me presta nada que la xente m'invada l'espaciu vital. Pero esta yera un torol.lu que nun cal.laba nin debaxo l'augua... You pouco a pouco diba reculando ensin que se diera cuenta, pero yera inútil, cada vez tábamos los dos más cerca la puerta los servicios.
Ya de sópitu, mientras you taba enfoutau n'al.lonxar aquel aliendu con golor a chorizu mezcláu con colonia penetrante, encomencéi a sentir sensaciones inquietantes. Cada vez qu'el.la s'acercaba ya you m'al.lonxaba instintivamente, sentía cómo la cremallera de la bragueta baxaba ya subía lentamente, pouco a pouco ya you sin poder controlar la situación.
Nun quería mirame pa la bragueta, porque cuanto más aquel.la muyer m'intimidaba, animada falando de los cuadros, la mía cremallera, como si tuviera un resorte que se movía col maxín de la paisana, xubía ya baxaba sin parar: ras, ras, ras, ras…
You miraba pa los l.laos ya dábame la sensación de que toos miraban pa mí, ya encomenzaban a xubime los colores ya outras cousas ya a poneme pálidu por momentos.
¡Qué la tía esta tien poderes, coñu!
Esto ya un misteriu. Pero ¡nin de coña!, nin con estas artimañas…
L'outru que taba con nós, el pintor qu'esponía, pasaba de too ya apurábase a prender un cigarru con outru ya aborronar p'animar inda más l'ambiente.
-¡Disculpáime, tengo que facer una l.lamada- dixi you casique taramiel.lando- voi fuera un momentu. Saquéi el móvil del bolsu ya ras, ras, ras, la cremallera xubió ya baxó más apriesa.
Igual tengo que dir hasta casa, tenéis que disculpame. El.la garróume la cara cola efusividá que la caracterizaba ya l.lantóume un par de besos…
-Bono, Antón, qué pena hom…entós nun vas volver a cenar con nosoutros.
-Sí, ho, agora volvo.
-Ras, ras, ras, ras.
Salí pa fuera escopetáu, aquel.lo diba p'arriba ya p'abaxo de manera imparable…Imposible, ¡qué me ta pasando! ya al dir abrir el parauguas vi qu'una varilla taba perfeutamente enganchada nel mayuelu la cremallera. You mesmu, al tener el parauguas apegáu a mí, colos mious movimientos baxaba ya xubía la cremallera. ¡Un milagru sexual! El parauguas yera'l responsable d'aquel tragu, responsable de las mías fantasías… El xube-baxa de la cremallera taba l.levantándome…falsas espectativas sobre aquel.la muyer bruxa ya al.louriada que sabía muncho d'arte, pero naquel momentu you convenciérame de que tenía outras artes.
Cuando taba paráu na cera echando tacos, encendíu con aquel parauguas sexual, qu'abrí con fuercia ya que corría'l peligru d'estrozar d'ira, l'universu qu'adornaba la tela fíxose de sópitu real, il.luminouse como si fuera una nueite estrel.lada, ya sin dame tiempu casi a contemplar aquel.las estrel.las yá la tenía outra vez al miou l.lau, interrumpiendo aquel momentu estelar:
-Antón, Antón, ¡dexasti las l.laves!
El sustu yá me pasara, ya volví, abangáu, hacia el.la.
-Casi peligra'l parauguas. Ensañéime con él porque nun yera quien a abrilu- disimuléi you.
-¡Él parauguas! Güei, qué paraguas, Antón, esto ya'l mesmu cielu!
El.la atechóuse conmigo pa contemplar aquel cuadru pintáu na tela ya encomenzóu a interpretar aquel lienzu de forma cóncava que s'il.luminaba cola escuridá de la nueite ya sobre'l que las gotas de chuvia facían música al caer., plof, plof, plof…
-Maraviosu, Antón, maraviosu atechase nesti parauguas. La to muyer tien un gustu esquisitu, esto ya una obra d'arte.
Al final el parauguas sexual despertaba emociones fuertes, evocaba distintas imáxenes sensoriales. Ya nesi momentu tuvi una ocurrencia d'artista:
- Acaba ocurríseme una idea xenial, fantástica: la próxima esposición, dixi-y you resueltu a la Comisaria, será una performance de paraguas. Voi estrename you con esta performance que l.lamará l'atención:
Parauguas de tolos tipos.
Parauguas de tolos colores.
Parauguas de tolos tamaños: grandes, pequenos, medianos, de xuguete…
Parauguas de tolos materiales: parauguas de tela, de plásticu, de seda, de bambú…
Parauguas de papel
Parauguas impermeables.
Parauguas rotos, romendaos, roíos, raíos, galdíos…
Parauguas con mangu de madera, de carey, de plata, de perlas…
Ya nel centru, el parauguas sexual, el miou parauguas, capaz d'elevar los miembros, alimentar la fantasía, elevar el maxín, el corazón…Ya capaz de presidir una esposición. El parauguas presidente que s'abre ya se zarra con elegancia ya sensualidá. Una cremallera xigante no techu la sala abrirase ya zarrarase cola mesma maxestosidá
El ruiu d'un bastiazu d'augua dende una manguera-ducha será lo que simulará la chuvia ya dará usu a aquel.los parauguas abiertos que chenarán la sala sedientos d'augua ya fantasías.
La comisaria flipaba al ver los mious dotes creativos. Dioume un abrazu que cuasi me descoyunta.
-Xenial, Antón, sos un artista xenial.
Esto, de xuru, que tendrá una bona subvención. ¿Nun salen agora las el Principáu? Pues a pidir perras que pa eso tán. La cultura hai que promocionala. El parauguas, ya un artiluxu perfeuto pa crear arte, puro arte.
Daquién escuitaba atentamente la nuesa conversación ya sin reprimise un res marmul.lou:
-¡Espilfarru! ¡Qué manera d'espilfarrar las perras públicas!
¡Parauguas sexual! ¡Performance de paraguas! Lo que me faltaba por oyer, tochos, más que tochos…ya inda más tochos los que las van a ver.
Ya abrío un parauguas xigante, con un furacu na tela, de xuru que pa ver la L.luna…
- ¡Señor, señor! El sou parauguas ya perfecto pa la performance ¿Podía cedénoslu?
Vamos, lo que me faltaba, sumame you a esas escentricidades. Ya siguió camín remungando ya protestando.
La Comisaria garróme del brazu, ¡venga, vamos pa dientru!, vamos buscar a esi piráu que vei morrer aborronando ya vámonos a cenar. ¡Una idea xenial! ¡Esto hai que celebralu!
Ya esta vez sí, realmente sentí una mano que palpando suavemente se dirixía a la mia bragueta.
"La Nutria"

 


 

HISTORIA FUNDACIÓN - DOLORES FDEZ. LEMA - BASES CONCURSO - PREMIO ESCOLAR - PREMIADOS - ENTREGA PREMIOS - CONTACTO